تجربة الديرما رولر derma roller ♥

السلام عليكم ورحمة الله وبركاته ♥ 

صباح | مساء الخير 

ان شاء الله في تدوينة اليوم راح احط فيها مجهود بحث طوويل 
راح اقولكم كل شي اعرفو من بحثي في مواقع الانترنت واطلاعي على تجارب ثانية 
وكمان من بعد سؤالي لطبيبة الجلدية الي اتابع معاها 

ان شاء الله اي شي تحتاجو راح تلاقو هنا ♥
ملاحظة :التدوينة راح تكون شوية طويلة عشان تكون مرجع لكم

ايش هيا اداة الديرما رولر : 
هي اداة لتقنية المايكرو نيدلز -يعني ابر صغيرة جداً -
هي طريقة علاج قديمة لكن كانت على اشكال مختلفة وما كان من الممكن استخدامها استخدام شخص -في المنزل-

الديرما رولر عبارة عن الة بها عجلة تحتوي على ابر صغيرة جداً - مايكرو -
تمرر على الاماكن اللي نبغا نعالجها او نحسن منها

ايش تسوي الديرما رولر :
تقوم باحداث ضرر بسيط بالمنطقة لتحفيز مادة الكولاجين على العمل ♥♥♥♥
مادة الكولاجين : هي المادة المسؤولة عن اعادة الشباب للبشرة ومعالجة الجروح والندبات والتخلص من الهالات 
والتصبغات 

سبب استخدامي للالة :
اول شي راح اقولو اني ما اخذت القرار بسهوله خصوصاً بعد الفيديوهات فاليوتيوب جداً مخيفة -لانهم بيستخدموها خطا-
لكن بعد بحث اكثر وشوفت الطريقة الصح اتطمنت واتضح لي انها ما تخوف بالعكس 
اتحمست اكثر اني استخدمها 
البحث استمر اكثر من سنة 
في فترة وجهي تعب من الحبوب والسبب انو بشرتي زي ما قولت في التدوينة السابقة - دهنية - 
وقررت اني اعالج الحبوب اول وبعدين اعالج الاثار واي مشاكل في بشرتي 
عالجتها بالروكتان الحمدلله واستمريت على الروكتان 6 شهور - راح اكتب تجربتي مع الروكتان - 
وبعد ما انتهيت كنت مستعدة لاستخدام الديرما رولر 
لكن الشيء الي زعلني =( اكتشفت اني ما اقدر الا لمن اكمل 6 شهور بعد الانقطاع من الروكتان 

وانا دحين كملت اكثر من 6 شهور وبدات قبل اسبوعين في استخدام الديرما رولر -يعني استخدمتها مرا وحدا -

ان شاء الله كل اسبوعين راح انزل تحديث للتدوينة باذن الله ♥
تجربتي الاولى | 
طريقة الاستخدام

 صورة الديرما رولر الي اخترتها 
لازم تكون النيدلز من تيتانيوم 
ويفضل الاداة اللي فيها 450 ابرة 
وطبعاً لازم تكون لها غطاء يحافظ على الابر 

انا استخدمت المقاس 1 ملم 
لان حاجتي لها - نظارة - مسامات - اثار حبوب ♥

    

1 | غسل الوجه 

2| تعقيم اليد والدريما رولر بكحول 70 % او اكثر 

بعض الاشخاص يستخدمو مخدر -كريم - للبشرة قبل الاستخدام 

يوضع المخدر ويترك نص ساعة ثم يغسل جيداً 

من راي - ان الالة تعمل على احداث ضرر بسيط لتحفيز الكولاجين وحسب ما بحثت ان الكخدر راح يقلل من فعالية الالة 

3 | فضلت استخدام الثج - ماء + ماء ورد مثلج 

امررو على وجهي ليقلل من الالم -لا يوجد الم ابدن لكن لانها اول مرا فضلت استخدم ثلج - 

اجفف المنطقة 

4| امسح وجهي بمسحة طبيه لتاكد من تعقيم الوجه 

5 | ابدا بتمرير الديرما رولر ♥

نقسم الوجه لمربعات -بالنظر - مثلا 3 سانتي في 3 

نحرك الالة من فوق لتحت 5 مرات طلوع ونزول 

(فوق تحت ) هاذي تعتبر 1 

يعين راح نمرر الالة بنفس المنطقة 10 مرات في اتجاة واحد 

وبعدين يمين يسار نفس العدد 

وبعدين زي الاكس 

نفس الموضح بالصورة 

مهم | لمن تبغي تغيري اتجاه الالة من مكانها وتنقليها مكان تاني لازم ترفعي الالة من مكانها 

عشان لا تجرحي بشرتك من برا وجوا 

بعد ما تخلصي كل الوجه راح تلاحظي احمرار بسيييط وممكن تخرج نقاط دم لا تخافي 

طبيعي الشي دا 

- انتظري دقايق بس وحطي الكريم او اي شي بشرتك محتاجتو بس لازم يكون طبي 

لان في الوقت دا البشرة راح تستقبل المنتج وراح يكون مفعولو مضاعف 

- استخدمت خلطة زيوت نقطة نقطة من كل زيت 

طبعاً ما نحتاج نغسل الوجه ولا شي على طول نحط الزيوت 

زيت فيتامين e لانه مرطب قوي - زيت بذور العنب لانه يحتوي على فيتامين سي ويخفف من تهيج البشرة -

زيت الافوكادو لانه يتحتوي على فيتامين أ ومضادات للحد من التجاعير 

قبل ما انام حبيت ارطب بشرتي استخدمت كريم الكولاجين مع فيتامين e 

صور من تصويري توضح لكم الابر حجم 1 mm 

عشان تشوفو انها ما تخوف مرا وقد ايش نحيفة وما تعور بس تحسي بوخزات بسيططة 

افضل نوع اللي يحتوي على 450 ابرة وتكون من التيتانيوم 

دليل الاستخدام 

 مقاس 0،25يستخدم للهالات والتجاعيد حول العين والشفايفمقاس 0،50يستخدم لمشاكل البشرة البسيطه (السطحيه) زي التجاعيد والكلف والخطوط الدقيقه ويعطي نظارة للبشرة ويشدها.مقاس 75،0للتجاعيد واثار الحبوب والتصبغات والمسامات الصغيرة وكمان تستخدم لفراغات فروة الرأس.مقاس 1،0للمسامات الكبيرة والحفر واثار الحبوب وكمان لعلاج تساقط الشعر والفراغاتمقاس 1,5للحفر واثار الحبوب الكبيرة ولعلاج التشققات ومشاكل الجسم *تشققات وسيلوليت*مقاس 2,0 و 2،5للتشققات العميقه والقديمة والسيلولايت

عدد مرات الاستخدام :

يفضل استخدامها مرتين بالشهر 

اسبوع ايوا واسبوع لا 

وكل حجم له وقت وعدد استخدامات بالشهر معينة 

ابحثي عن الحجم الي تبغي تستخدمي وراح يكون مكتوب على العلبة حقت المنتج كمان 

الحجم الاكبر على ما اتذكر انها كل 3 اسابيع مرا 

تحذيرات | 

لا تتركي الديرما رولر مكشوفة ابداّ عشان لا تتجرثم وكمان لا تتاذى الابر 

ممننوووع استخدام الالة لاكثر من شخص 

ممنوع تستخدمي الالة لاكثر من منطقة 

تعقيم الالة يكون قبل وبعد الاستخدام 

لا تضغطي على الالة بقوة عشان لا تاذي بشرتك 

لا تستخدم على الحبوب الي لها راس 

ممنوع التعرض للشمس بعد استخدام الديرما رولر 

ممنوع وضع الميك اب او اي شي فيه الوان ومواد كيميائية بعد الجلسة 

عزيزتي اي قرار تحسي نفسك مترددة فيه 

استخيري الله 

وابحثي عنه لين تقتنعي وتعرفي السلبيات والايجابيات وهل يناسب احتياجك او لا 

♥♥♥♥♥♥♥♥♥

سناب شات : ashwaq.blog1 

انستجرام : ashwaq.blog 

ايميل : ashwaq.blog1@gmail.com